பூவிடைப் படினும் யாண்டு கழிந்தன்ன

சாட்டில் பேசிக்கொண்டே
ட்விட்டரில் தகவலைத் தேடுகிறேன்
ட்விட்டரின் தகவல் கண்ணொளிர்கிறது 
மின்மடல் இன்னும் காணோம்
மடல் வந்துவிட்டது ஆனால்
ஏன் இந்தச் சாட் ஜன்னலில்
அன்புக்குச் சில நொடிகள்
ஒளிவருடத் தாமதம்?
சாட்ட்விட்டர்மடல்சாட்ட்விட்டர்
மடல்சாட்ட்விட்டர்மடல்சாட்ட்விட்

சில விளம்பரச் சுட்டிகள்
கண்ணை மறைக்கின்றன
நடுநடுவே
திடீரென சில tabகள்
முளைக்கின்றன மலர்கின்றன
முகப்பரு கிரீம்கள் பிராக்கள்
தள்ளுபடி அழகிகள்
சின்னக் கண்சிமிட்டல்கள்

தொடும் அரவணைக்கும்
தடவும் பிடிக்குள்வைக்கும்
கைகள்
யாருக்கு வேண்டும்?
எழுத்துகள்
இடைப்புள்ளிகள்
இமோஜிகள்
ஸ்மைலிகள்
பூனைகள்
உடையும் சிதறும் படபடக்கும்
சிவப்பிதயங்கள்
இன்னுமின்னும்
என் திரை நிறையவேண்டும்
அங்கே கூடவேண்டும்
அந்த இரண்டு கைகளின்
தொழில்நுட்ப வேகம்

(பதிவில் வெளிவரும் கவிதைகளையோ கருத்துகளையோ பத்திரிகைகளில் என் அனுமதியின்றி பிரசுரிக்க வேண்டாம். நன்றி.)