ஜேம்ஸ் டேட்-டின் குரங்குக்குக் கவிதையெழுதக் கற்றுத்தருவதைப் பற்றிய கவிதை பற்றிய கவிதை

ஜேம்ஸ் டேட்-டின் கவிதையில்
அந்தக் குரங்குக்கு அவர்கள் கவிதையெழுத
கற்றுக்கொடுத்தபோது
பெரிய சிக்கலொன்றும் இல்லை
குரங்கை நாற்காலியில் கட்டிப்போட்டார்கள்
ஒரு பென்சிலை அவன் கையைச் சுற்றிக் கட்டினார்கள்
(காகிதம் ஏற்கெனவே வைக்கப்பட்டுவிட்டது)
டாக்டர் புளூஸ்பைர் குரங்கின் தோளின் மேல் சாய்ந்து
அவன் காதுக்குள் கிசுகிசுத்தார்
”அங்கே அமர்ந்திருக்கையில்
கடவுளைப்போலிருக்கிறாய்
ஏன் நீ ஏதாவது எழுத முயற்சிக்கக்கூடாது?”
மன்னியுங்கள் ஜேம்ஸ் டேட்
(எனக்குத் தெரிந்த)
அந்தப் பூனைக்குட்டியை
நாற்காலியில் கட்டிப்போட்டார்கள்
மடிக் கணினியை அவள்முன் வைத்தார்கள்
நாற்காலியின் பின்னால் ஏற்கெனவே
வந்துநின்றுவிட்ட வாசகர்
அவளிடம் கோரிக்கை வைத்தார்
”அங்கே அமர்ந்திருக்கையில்
அச்சுஅசலாகச் சூனியக்காரி நீ
ஏதும் செய்வினை செய்யக்கூடாதா?”
பூனைக்குட்டி தட்டச்சு செய்யுமென்பது
உங்களில் எத்தனை பேருக்குத் தெரியும்?

(James Tate, "Teaching the Ape to Write Poems")

எழுத்து

போட்ட வட்டத்திலேயே
உங்கள் கடவுள்களையும் தூக்கிக்கொண்டு
இப்படி எத்தனை சுற்றுகள் 
ஓடப்போகிறீர்கள்?
வட்டத்தைச் சதுரமாக்குதல்
கண்கட்டிப் பாம்பாக்குதல்
எத்திக் கலைத்தல்
ஒன்றும் சுவாரசியமில்லை
வட்டத்தை வழித்தெடுத்து
சுண்டிவிரலால் ஒரு சுண்டு
சுருளாகி எட்டுகள் சுழன்று
ஆட்டம் ஆடுவோம்
பூமியை பால்வெளியை
தொட்டுத் தொட்டு

ஒரே போடு

ஒரு மனம் ப்ளீஸ்
கடனட்டைகளில்
சாம்பார் ருசியில்
மனங்களில்
மண்டையோட்டில்
ஒரு மனம் ப்ளீஸ்
(பொடிப்பொடியாகவாவது)

காலம் கடந்தும்
பிணம் (என்றால்)
பூக்களின் கெட்டவாசனை
யூகங்களின் கொடுநிழலில்
ஓடிக்கொண்டிருத்தல்

சதுரமான மனம் போலிஸ்
முழுவட்டமான மனம் தாய்மை
கோணலான மனம் நோய்
வரையறைகளுக்கு அப்பால்
சுயபெருமித மனம்
கலகம் ஒரே புனைவுச் சிக்கு

ஆயிரமாயிரம் எண்ணங்களில் மனம்
கடவுளாக சிலைத்துவிட்டது
நேர்த்திக்கடன்களைக்
கோருகிறது கவிதையிலும்
என் கைகள் சுத்தியலைத் தேடுகின்றன
ஒரே போடு

குளிர்க்கண்ணாடி போட்டிருந்த பூனைக்குட்டி

ஏன் குளிர்க்கண்ணாடி போட்டிருக்கிறாய்
என்று பூனைக்குட்டியிடம் நான் கேட்கவேயில்லை
ஆயிரம் ரகசியம் அதற்கு இருக்கும்
அதுவேதான் பீத்திக்கொண்டது
பாரேன் பாரேன் ரேபான் டுவெண்டி தௌசண்ட் ருபீஸ்
ஒரு பிரபல இளம் நடிகரைப் போல
என் மேசையில் புத்தகங்களை
அலேக்காக தாண்டி
இருகால்களில் நின்று
முகத்தைமட்டும் திருப்பிக்காட்டியது
கொஞ்சம் பொறாமையில்
எங்கே கிடைத்தது இருபதாயிரம்
என மெதுவாய்த்தான் கேட்டேன்
உன் விசாரணையை
உன் புருஷனிடம் வைத்துக்கொள்
என்றது நாக்கை நீட்டி அழகுகாட்டி.
எதற்கும் பாராட்டிக் கைதட்டிவைத்தேன்
எந்தப் புற்றில்
எந்தக் குளிர்க்கண்ணாடியோ

கவித்துவம்

மெல்லிடைக் கோப்பையில்
மல்லிகை நிலவை
மிச்ச மதுவில்
விளிம்பு நசுங்காமல்
அலுங்காமல்
அமிழ்த்திக் கொல்லல்

அழுக்கு சாக்ஸ்

அதன் ஜோடியைக் காணோம்

டிரையர் தின்றிருக்கும்

இயந்திரத்தின் பசிக்கு வரலாறுண்டு

இல்லாவிட்டால்

காக்கா தூக்கிக்கிட்டுப் போயிருக்கும்

என்ற சொலவடையில்

தன்னிருப்பை உறுதிசெய்ய

காகம் தூக்கிக்கொண்டு போயிருக்கும்

ஒருவேளை சாக்ஸ் அணிந்த காகத்தைப் பார்த்தால்

எனக்குத் தெரிவியுங்கள்

சாக்ஸின் விவரம் சாக்ஸ்

காகத்தின் விவரம் ஒருவருக்குக் கருப்பாக

இன்னொருவருக்கு மஞ்சளாகத் தெரியும்

கண்ணைப் பொறுத்தது

ஒருவரும் இன்னொருவரும் பார்த்தால்

என் சாக்ஸைத் திருப்பிக்கொடுத்துவிட்டு

வைத்துக்கொள்ளுங்கள்

நிறம்பற்றிய உங்கள் சண்டையை.

 (பதிவில் வெளிவரும் கவிதைகளையோ கருத்துகளையோ பத்திரிகைகளில் என் அனுமதியின்றி பிரசுரிக்க வேண்டாம். நன்றி.)

திட்டம்

மனதைக் கொண்டு செல்ல புறாவை அனுப்புவது பழைய ஏற்பாடு காற்றோ கோஷத் துவேசமாகிவிட்டது பூக்களைக் கவிதைகளே கைவிட்டுவிட்டன மேலும் உண்மையிலேயே மனதை அனுப்பவேண்டும் சொல்லுக்கும் பொருளுக்கும் அல்லது பொருளுக்கும் உருவகத்துக்குமான இடைவெளிகளில் துரோகங்கள் ஓடோடிவந்து கைக்குட்டைகளைப் போட்டுவிடுகின்றன நாகரீக நாசூக்கு முளைக்கும்முன்பே மொட்டையடிக்கவேண்டும் ஒரு பிளேடு அதிக செலவில்லை அப்புறம் ஒரு வாசனை தடவப்பட்ட கடித உறை நடுகல்வீரனின் கையில் தலை வான்கோ செய்துபார்த்த கலை இதையெல்லாம் நிரூபிக்க ஒரு மனதை தள்ளுபடியிலாவது வாங்க வேண்டும்.
















(பதிவில் வெளிவரும் கவிதைகளையோ கருத்துகளையோ பத்திரிகைகளில் என் அனுமதியின்றி பிரசுரிக்க வேண்டாம். நன்றி.)